თურქეთში LGBTQ+ თემის წინააღმდეგ მიმდინარე დაკავებებისა და რეიდების ფონზე ანკარასა და სტამბოლში გამართულ საპროტესტო აქციებზე პოლიციამ, სულ მცირე, 126 ადამიანი დააკავა, – ამის შესახებ „როიტერი“ წერს.
მედიის ცნობით, პარალელურად, სასამართლოს გადაწყვეტილებამდე წინასწარი პატიმრობა კიდევ 31 ადამიანს შეუფარდეს. ამის შესახებ ადვოკატები აცხადებენ. უფლებადამცველების განცხადებით, დაკავებულებს შორის არიან როგორც აქტივისტები, ისე ჟურნალისტები და სხვა მოქალაქეები.
აქციები მას შემდეგ გაიმართა, რაც თურქეთის სხვადასხვა პროვინციაში LGBTQ+ ორგანიზაციებისა და მათი მხარდამჭერების წინააღმდეგ რეიდები განხორციელდა. ადვოკატების ინფორმაციით, ბოლო დღეებში სამართალდამცველებმა ორგანიზაციების ოფისები გაჩხრიკეს და ათობით ადამიანი დააკავეს.
თურქეთის ხელისუფლება LGBTQ+ ორგანიზაციებსა და აქტივისტებს სხვადასხვა სამართალდარღვევაში ადანაშაულებს. ხელისუფლების წარმომადგენლები აცხადებენ, რომ სახელმწიფო კანონის შესაბამისად მოქმედებს.