უკრაინა იძულებულია მასშტაბურად შეამციროს მოქმედი ბიუჯეტის ხარჯები, თუ კანონმდებლები არ მიიღებენ არაპოპულარულ ზომებს, რომლებიც აუცილებელია ზამთრის დადგომამდე დასავლური დახმარების სახით მილიარდობით დოლარის მისაღებად. ამის შესახებ პრემიერ-მინისტრი, სერგეი კორეცკი აცხადებს.
პრემიერის შეფასებით, პარლამენტში რამდენიმე თვის განმავლობაში გაჭიანურებულმა პროცესმა უკვე გამოიწვია ევროკავშირისგან დაახლოებით 4 მილიარდი დოლარის ოდენობის დახმარების დაგვიანება, რომელიც ქვეყანას მესამე კვარტალში უნდა მიეღო. უკრაინის სახელმწიფო ფინანსების მდგომარეობა მან „კრიტიკულთან ახლოს“ მყოფად შეაფასა.
კანონმდებლების წინააღმდეგობა იმ რეფორმების მიმართ, რომლებსაც ევროკავშირი და საერთაშორისო სავალუტო ფონდი ითხოვენ, იმ ფონზე წარმოიშვა, როდესაც კიევმა ოფიციალურად დაადასტურა, რომ საომარი ხარჯების მატების გამო, წელს თავდაცვის ბიუჯეტში დამატებით 27 მილიარდი დოლარის დეფიციტი წარმოიშვა.
კორეცკიმ აღნიშნა, რომ უკრაინას ახლა ხშირად უწევს ძვირადღირებული რაკეტების გამოყენება რუსული უპილოტო საფრენი აპარატების ჩამოსაგდებად. მისი თქმით, ეს ერთ-ერთი მიზეზია, რის გამოც უკვე მეხუთე წელია მიმდინარე ომის ხარჯები ზრდას განაგრძობს.
ამავდროულად, კორეცკიმ მოუწოდა საერთაშორისო პარტნიორებს, შეამცირონ დაფინანსებასთან დაკავშირებული გაურკვევლობა უკრაინის წინაშე საშუალო და გრძელვადიანი ფინანსური ვალდებულებების აღების გზით. მან ასევე დაიცვა ინიციატივა დაბალფასიან უცხოურ ამანათებზე დამატებული ღირებულების გადასახადის დაწესების შესახებ.
კიევის უცხოელი დონორები ითხოვენ ზომების მიღებას ჩრდილოვანი ეკონომიკის შემცირების, საგადასახადო შემოსავლების გაზრდისა და ქვეყნის კანონმდებლობის ევროკავშირის ნორმებთან შესაბამისობაში მოყვანის მიზნით.